“TUBORESHE NJIA ZA UKUSANYAJI WA MAPATO” MKURUGENZI ERICA YEGELLA

Posted on: July 11th, 2023

Mkurugenzi wa Halmashauri ya Mji Masasi, Bi. Erica Yegella amewataka watumishi wa umma kufanya kazi kwa ufanisi na weledi ili kuongeza tija katika utendaji kazi hususani katika ukusanyaji wa mapato.

Bi. Yegella amesema ukusanyaji wa mapato ndio chachu ya maendeleo  na hivyo kuwataka watumishi wote kushirikiana kikamilifu ili kutimiza lengo hilo.

Amesema hayo July 10, 2023 wakati akizungumza na watumishi wa halmashauri ya mji masasi katika ukumbi wa mikutano uliopo katika jengo la utawala katika halmashauri hiyo.

“Kwenye upande wa mapato mweka hazina na timu yako na wakuu wa Idara na Vitengo nyinyi nyote mnahusika kwenye ukusanyaji wa mapato, shule zetu za private zinatakiwa zitoe mapato, hospitali zetu, maduka yetu, viwanda nk. vinatakiwa vitoe mapato vyote mviainishe vizuri” amesema

Mkurugenzi Yegella ameagiza kuwekwa kwa mageti  ya chuma katika vipenyo vikuu vya barabara ili  kuhakikisha lengo la ukusanyaji mapato linafanikiwa kwa ufanisi.

 “..na sasa hivi afisa utumishi mjipange mnaweka mageti mangapi katika vipenyo vikuu, kwasababu ukusanyaji wa mapato ndio kiu yangu” amesema

Aidha ameyataka  mashirika yasiyo ya kiserikali (NGOs) kuhakikisha yanazingatia taratibu, kanuni na sheria hususani katika kudumisha maadili ya kitanzania.

“kwa upande wa NGOs zote zinazofanya kazi katika shule zetu tuzijue , zisimamiwe na tujue wanafundisha nini kwa watoto wetu na tuzijue na ziwe zimesajiliwa, NGOs ambazo hazijasajiliwa hazitaruhusiwa katika halmashauri yetu” amesema

Kwa upande wao watumishi wameahidi kutoa ushirikiano wa dhati kwa Mkurugenzi wa halmashauri ili kuhakikisha dhamira na malengo ya halmashauri yanatimia kwa ukamilifu.