MILIONI 399 ZATOLEWA KWA VIKUNDI 75 MASASI MJI, AWAMU YA KWANZA MIKOPO YA ASILIMIA 10.

Posted on: January 26th, 2025

Jumla ya Tsh Milioni 399 zimetolewa kwa vikundi 75 katika Hafla ya Utoaji wa Mikopo kwa vikundi vya wanawake, vijana na watu wenye ulemavu iliyotokana na asilimia 10 ya mapato ya ndani Halmashauri ya Mji Masasi kwa awamu ya kwanza mara baada ya Rais wa Jamhuri ya Muungano wa Tanzania Mhe. Dkt. Samia Suluhu Hassan kuridhia na kurejesha mikopo hiyo ili kuwasaidia wananchi kiuchumi.

 Akizungumza leo, Januari 26, 2025 katika hafla iliyofanyika  katika Ukumbi wa  Chuo cha Maendeleo FDC,  Mgeni rasmi, Mbunge wa Jimbo la Masasi Mjini Mhe. Geoffrey Mwambe amewataka kwenda kuitumia mikopo hiyo kwa malengo yaliyokusudiwa na kufanya biashara kwa ufanisi ikiwemo kutunza hesabu vyema ili uwezeshaji kwa wananchi kiuchumi uliokusudiwa uwe na matokeo Chanya. 

“ Tunamshukuru Rais Dkt. Samia Suluhu Hassan kwa kurejesha mikopo hii, lengo letu ni kuhakikisha uwezeshaji wa wananchi wa Masasi kiuchumi unafanikiwa. Kwa wananchi wetu, Tunazo fursa nyingi sana mbali na mikopo hii, ikiwemo TFS kuna mfuko wa uendelezaji wa misitu (TFF) wa kutoa ruzuku, uvunaji wa asali na shughuli mbalimbali za Halmashauri kama ujenzi n.k na nahimiza vikundi hivi kwenda kujisajili na Mfumo wa Manunuzi ya Umma (NeST) ili vipate kazi mbalimbali za Serikali” amesema. 

Mkurugenzi wa Halmashauri ya Mji Masasi Ndg. Reuben Sixbert Jichabu amewahimiza  wanufaika kuhakikisha wanarejesha fedha hizo kwa wakati ili ziweze kutolewa kwa vikundi vingine na tayari hadi sasa kupitia mapato ya ndani zaidi ya milioni 200 zimechangiwa kwenye mfuko wa maendeleo ya wanawake, vijana na watu wenye ulemavu kwa ajili ya awamu inayofuata. 

Mwenyekiti wa Halmashauri ya Mji Masasi Mhe. Hashim Namtumba amesema waheshimiwa madiwani wamefanya kazi muhimu kuhakikisha mikopo hiyo inatolewa ili kuwezesha ustawi wa wananchi na kwamba hakuna kikundi kilichopata kwa upendeleo na hivyo vikundi vyote vikawe mabalozi wa kusema mazuri ya Serikali na Halmashauri kwa kuwa awamu nyingine ya mkopo inafuata.

Mwenyekiti wa CCM wilaya ya Masasi, Mariam Kasembe amewahimiza wanufaika kuhakikisha hawatumii fedha hizo kinyume na malengo yaliyokusudiwa wakati wa kuunda vikundi na kuomba mikopo hiyo na kuacha shughuli zisizokusudiwa  ikiwemo kutumia kwenye sherehe.

Akizungumza kwa niaba ya Mkuu wa Maendeleo ya Jamii, Mratibu wa Mikopo hiyo, Ndg. Ebenezer Uisso amesema jumla ya vikundi 75 vimepata mkopo wa Tsh. millioni 399 kwa mchanganuo wa vikundi vya vijana 24 vimepata Tsh 160, 325, 000, vikundi vya wanawake 47 vimepata  Tsh  222,675,000 na watu wenye ulemavu vikundi 4 vimepata Tsh. milioni 16.