WALIMU SEKONDARI MASASI MJI WAPATIWA MAFUNZO KUHUSU UTEKELEZAJI WA MTAALA ULIOBORESHWA

Posted on: January 6th, 2025

Walimu wa Shule za Sekondari Halmashauri ya Mji Masasi wanaofundisha kidato cha kwanza mkondo wa jumla na kidato cha pili mkondo wa Amali (masomo ya jumla) leo Januari 6, 2025 wamepatiwa mafunzo kupitia Darasa Janja “Smart Classes”kuhusu utekelezaji wa Mtaala wa Elimu ulioboreshwa wa mwaka 2023.

Mafunzo hayo ya siku tatu yanayotolewa na Taasisi ya Elimu Tanzania kwa kushirikiana na Ofisi ya Rais-TAMISEMI yanalenga kukuza uelewa wa jumla kwa walimu kuhusu maboresho ya Mtaala wa Elimu ya Sekondari hatua ya chini kwa Mkondo wa jumla na Mkondo wa Amali na namna ya kutekeleza.

Mafunzo hayo yanatarajiwa kuwezesha walimu kumudu mbinu za ufundishaji na ujifunzaji zinazozingatia ujenzi na umahiri.

Kwa Halmashauri ya Mji Masasi mafunzo hayo yanafanyika kuanzia  Januari 6, 2025 hadi Januari 8, 2025 katika Ukumbi wa Shule ya Wasichana Masasi huku mtaala huo unatarajia kuanza kutekelezwa Januari 2025.