BARAZA LA MADIWANI LAIPONGEZA KAMATI YA FEDHA NA UTAWALA, MKURUGENZI KWA UKUSANYAJI WA MAPATO

Posted on: January 29th, 2025

Baraza la Madiwani Halmashauri ya Mji Masasi likiongozwa na Mwenyekiti wake Mhe. Hashim Namtumba limeipongeza kamati ya Fedha na Utawala kwa usimamizi mzuri wa ukusanyaji wa mapato ya ndani yaliyofikia asilimia 89 ya makusanyo kwa kipindi cha robo ya pili 2024/2025.

 Baraza limetoa pongezi hizo Januari 29, 2025 katika Mkutano wa Baraza la Madiwani wa Kupokea, Kujadili na Kupitisha Taarifa za Kamati za Kudumu robo ya pili kwa kipindi cha Oktoba-Disemba 2024/2025. 

 Awali akiwasilisha Taarifa ya Kamati ya Fedha na Utawala kwa niaba ya Mwenyekiti wa Kamati, Makamu Mwenyekiti wa Halmashauri ya Mji Masasi Mhe. Hamisi Nikwanya amesema hadi kufikia Disemba Halmashauri ya Mji Masasi katika mapato toka vyanzo vya  ndani ilikuwa imekusanya Tsh 3,021,251,720 sawa na asilimia 89.    

Mwenyekiti wa Halmashauri ya Mji Masasi Mhe. Hashim Namtumba amesema mbali na pongezi hizo jitihada zaidi ziendelee ili asilimia zipande hadi asilimia 150  hususani kwenye baadhi ya vyanzo ambavyo vipo chini kwenye asilimia za makusanyo ili kuhakikisha malengo ya ukusanyaji yanazidi malengo yaliyokusudiwa ili iweze kusaidia kuongeza ukomo wa bajeti inayofuata.

Kwa upande wake, Mwakilishi wa Katibu Tawala Mkoa wa Mtwara, Bi Edith Shayo amesema Halmashauri ya Mji Masasi ni mfano mzuri wa kuingwa katika ngazi ya Mkoa hivyo kasi iendelee ili kuzidi kuwa mfano bora kwenye utekelezaji wa bajeti na miradi ya maendeleo. 

Diwani Kata ya Mkomaindo, Mhe. Ally Salvatory amesema kwa kipindi cha miaka zaidi ya mitano iliyopita rekodi hiyo ya asilimia 89 ni yakiwango cha juu zaidi na yakihistoria katika makusanyo ya ndani.